நீயும் இப்படித்தானா??!!!

தோல் குடத்துக்குள்
சூல் கொண்டு
கருவறையினின்று
உருவாகி வந்தவனே!!


இதுதான் மாட்சி
இவைதான் மாண்பு - என
பெற்றோர் உரைக்க
செவிமடுத்து வளர்ந்தவனே!!

தான்கொண்ட துன்பமது

தனயனுக்கு வேண்டாமென

தகப்பனின் செல்லத்தில்

தழும்பித் தவழ்ந்தவனே!!

நடந்தால் அய்யகோ

நடுப்பாதம் வலிக்குமென

நடுமுதுகில் சுமந்ததால்

சுகவாசி ஆனாயோ?!!

நாளை என்றொரு நாளில்

நானிலம் பெருமையாய் - உனை

முகம் நிமிர்த்து பார்க்குமென

நயமாக நினைத்திருந்தேன்!!

அறிவார்ந்த நூல் சுமக்கும்

செறிவான கரங்களில்

கொலைப்பழி செய்யும்

அரிவாள் சுமந்ததேனோ??!!

நாளை உனை இவ்வுலகில்

அரியணை ஏற்றுவிக்க

கற்றுக்கொடுக்கும் ஆசிரியர்

இறைவனுக்குச் சமமன்றோ!!

ஆட்டிரை அகத்திக் குலைபோல்

சிரம்வெட்டிச் சாய்க்கும்

அறிவற்றோருக்கும் உனக்கும்

வித்தியாசம் இல்லையா??!!

கல்வியிலும் செயலாற்றலிலும்

சமூக சிந்தனைகளிலும் - சிறந்த

மாணவர் மத்தியில் உனைப்போல் சிலர்

களைந்தெறியப்பட வேண்டிய களைகளே!!

என்று வந்ததடா உனக்குள்

கொலைச்செயல் மனோபாவம்

யாரிங்கு காரணம்

உனக்கான இந்நிலைக்கு??!!

வளர்த்த எம் குற்றமோ?

செதுக்கிய சமூகத்தின் குற்றமோ?

உய்வித்த கல்விநிலையக் குற்றமோ?

நானிங்கு அறியேனய்யா!!!

நற்கல்வி பயின்று வா

நல்லொழுக்கம் கற்று வா - என

யாரிங்கு உரைத்தாலும்

நஞ்சென தோன்றுகிறதோ?!!

அடிமேல்  அடிபட்டாலும்

பொதிசுமக்க வேண்டுமென

கழுதைக்கும் தெரியுமடா

உனக்கேன் தெரியாது போயிற்று?!!

சீரிய நின் சிந்தனைகளால்
நாளைய சமூக மாற்றம்

உன் கையில் தானென - யாம்

எண்ணியிருந்த வேளையில்!!

நெஞ்சம் குறுகிப் போனதய்யா

உள்ளம் கருகிப் போனதய்யா

நான் காணும் இவ்வுலகில்

நீயும் இப்படித்தானா??!!

அன்பன்

மகேந்திரன்